＊Vegas’s 我不是少女 部落格

話說，我同男朋友已經一齊左七年，

人類總係對未知嘅未來會恐懼，但女人點解會執着於30歲呢個年齡？無論你係20歲，25歲，28歲好多時都會用30歲你做一個界限。 

香港人一定識英文? 其實係香港,除非你係BBC/ABC呢D, 否則好多人既英語水平只局限係某方面, 做餐飲業既會識得菜色,餐具的英文; 銷售行業熟悉咩係sweater同sneaker(我以前成日都搞錯) ; 白領族更加唔洗講. Business English係入場卷,幾隻字都唔識打,請你返黎坐? 不過事實上好多時,你既上手同事或公司會提供template,所以香港人既英文多數局限於熟悉既範圍, 一旦真係到外國出遊,會出現詞不達意或只能用短句既情況. 哈哈, 我就係個種唔係唔識,只係唔叻既人啦! 所以想係到分享下我呢半年係Wall Street English校園生活.

學費係咪好貴?

好老實講, 由外國人教既班一般都唔平. WSE會按學生購買既課堂黎收費,即係話你買得愈多,每堂既平均費用就愈平. 一般黎講係HKD$1400-$1800一個月.另外學校規定要收每個新學生學術費，由6xxx 去到 8xxx. 我自己第一次揀嘅係四個階段，總共讀一年，學術費係6990,另外每個月要俾$1747. 不過後來因為佢哋做周年promote, 我就再買多6個階段，大概18個月嘅課程，呢18個月嘅總費用大概係: $1400 x 18個月，再加9000學術費。

教學原理？

因為我參加嘅唔係考試班，而係全面提升班，佢可以分做四部份:

English anytime + digital books:

以上呢兩個都係佢哋提供嘅系統功課，你必須完成晒呢啲功課先可以去預約上堂(Encounter class)，否則你未必會跟到教學程度. 不過其實功課量唔算多，完成一個程度嘅功課大概係三個鐘，入面有好多模擬對話，其實都幾得意😂另外一面提供聽寫讀說四部分，都係屬於比較由淺入深嘅功課

Complementary class （CC)

CC class 係比較着重講嘅部份，通常會由外國老師帶領同學分組去討論某個話題，又或者輪着每人去發表一啲簡單嘅意見。我自己好鍾意呢個班，呢個班亦都係幫到我最多，有好多道地嘅美語都會係呢個班到教，而且過程比較輕鬆，每個課堂嘅時間大概一個鐘，過程幾好玩，所以每堂時間都過得好快。

Encounter class

呢部份主要係講解formal English同比較Academic既野，例如唔同文法，唔同嘅字眼應該點樣用喺唔同嘅情況。所以我之前講過嘅功課就係牽連到呢部份，你一定要做晒啲功課，你先會知道導師係講緊乜？因為係呢個課堂老師會測試你嘅英文水平，你要達到某個程度先可以進入下一個階段，否則你係需要從頭再讀過呢個階段。

Social club

以上提及過嘅班大部份都係小組教學，但係而家講緊呢個人數可以去到20人一班，每個月佢哋都會有唔同嘅題目，基本上佢哋每日都會有班，你可以自己選擇自由參加。課程內容有討論新聞，節日慶祝，writing workshop, 或者手工藝班等等。

呢張相係我中午時段影既，由於閒日嘅關係所以人數比較少，如果係夜晚一般都會有20人左右。

我既感想？

我唔敢話我推薦呢間學校，因為可能我同你嘅學習方式唔一樣，但無可否認呢間學校真係幫到我🤭🤭但大前提係你要自律加勤力，自律去做功課，勤力去上堂，唔好妄想毫冇付出就可以有進步。我喺度頭三個月唔覺得自己有咩進步，但係去到六個月嘅時候，我發現各方面都有明顯改善，當然唔係話一下子去到ielts 9分水準，但一定比以前更加流利同自信，喺呢度係提供左好好嘅資源俾你，但你唔識利用最好嘅資源都係白費。我覺得呢個係適合一啲已經有基本英文水平既人，如果唔係會比較吃力，因為佢係一個全英文環境，就算同學同同學之間都會去用英文溝通，另外值得一讚嘅係，我嘅老師阿John，佢真係一個好好嘅美國老師，除咗我以上講嘅四部份，我有時都會自己寫文章去俾佢改，佢冇責任要幫我改，但係佢好鼓勵我繼續寫俾佢改，而且佢同我以前係香港讀書嘅老師唔一樣，佢哋更加願意用鼓勵嘅方式去encourage 學生，你經常性都會聽到佢哋話: Well down! Good job! You can do it! 令到你個人信心返晒黎，可能呢個就係外國同香港嘅教育分別，給予支持往往比責罰同投訴更加見效。

*其實除咗以上比較有系統的方法，我自己都研究左唔少免費嘅學習方法，有時間再嚟同大家分享